ಕ್ರಿಸ್ತೀ ಜಿಣಿಯೆ ಸಮುದಾಯ್, (C L C), ಪೆರ್ಮನ್ನೂರ್
ಸಿ.ಎಲ್.ಸಿ ಪೆರ್ಮನ್ನೂರ್ ಭಾಂಗ್ರಾಳೋತ್ಸವ್ ಉದ್ಘಾಟನ್ ಕಾರ್ಯಕ್ರಮ್
C L C Golden Jubilee Inauguration Program
ತಾರೀಕ್ 02-02-2025 ವೆರ್ ಆಯ್ತಾರಾ ಸಕಾಳಿಂಚಾ 8:30 ವರಾರ್ ಪೆರ್ಮನ್ನೂರ್‌ಚೊ ವಿಗಾರ್, ಸಿ.ಎಲ್.ಸಿ.ಚೊ ದಿರೆಕ್ತೊರ್ ಭೊ| ಮಾ| ಸಿಪ್ರಿಯನ್ ಪಿಂಟೊ ಬಾಪಾಂನಿ ಅರ್ಗಾಂ ಮಿಸಾಚೆ ಬಲಿದಾನ್ ಭೆಟಯ್ಲೆಂ, ಉಪ್ರಾಂತ್ ಇಗರ್ಜೆಚ್ಯಾ ಮುಖ್ಲ್ಯಾ ದ್ವಾರ ಥಾವ್ನ್ ಬ್ಯಾಂಡಾ ವಾಚ್ಪಾ ಸಂಗಿ ಪುರ್ಶಾಂವಾರ್ ಇಗರ್ಜೆಚ್ಯಾ ಮಾಳಿಯೆ ಸಾಲಾಕ್ ಸರ್ವ್ ಸಾಂದೆ ಆನಿ ಸರ‍್ಯಾಂನಿ ಪ್ರವೇಶ್ ಕೆಲೆಂ.
ಸುರ್ವೆರ್ ಹೋಲಿ ಏಂಜಲ್ಸ್ ಹಾಯರ್ ಪ್ರೈಮರಿ ಇಸ್ಕೊಲಾಚ್ಯಾ ವಿದ್ಯಾರ್ಥಿಂ ಥಾವ್ನ್ ಸ್ವಾಗತ್ ನೃತ್ಯ್ ಆಸಾ ಕೆಲ್ಲೆಂ. ಸ್ವಾಗತ್ ನೃತ್ಯ್ ಜಾತಚ್ ಬ್ಯಾಂಡಾ ವಾಚ್ಪಾ ಸಂಗಿ ಸಮುದಾಯೆಚೆ ಅಧಿಕಾರಿ ಆನಿ ಸಯ್ರ್ಯಾಂನಿ ವೆದಿ ಪ್ರವೇಶ್ ಕೆಲಿ.
ಕುಮಾರಿ ಸ್ವೀಡಲ್ ಡಿಸೋಜ ಆನಿ ಸಾಂಗಾತ್ಯಾನಿ ಪ್ರಾರ್ಥನ್ ಗೀತ್ ಗಾಯ್ಲೆಂ. ಉಪ್ರಾಂತ್ ಸಿ.ಎಲ್.ಸಿ.ಚೊ ಅಧ್ಯಕ್ಷ್, ಶ್ರೀ ಜೋಸೆಫ್ ಡಿಸೋಜಾನ್ ಸರ್ವಾಂಕ್ ಸ್ವಾಗತ್ ಕೆಲೆ. ಭಾಂಗ್ರಾಳೋತ್ಸವಾಚೊ ಸಂಚಾಲಕ್ ಶ್ರೀ ಮೆಲ್ವಿನ್ ಸಿ. ಡಿಸೋಜಾ ಪ್ರಸ್ತಾವಿಕ್ ಉತ್ರಾಂ ಉಲಯ್ಲೊ. ಸಮುದಾಯೆಚೊ ಸ್ಥಾಪಕ್ ಅಧ್ಯಕ್ಷ್ ಶ್ರೀ ಮೌರಿಸ್ ಮೊಂತೇರೊನ್ ಸಮುದಾಯೆಚಿ 49 ವರ್ಸಾಂಚಿ ಝಳಕ್ ಸರ್ವಾಂ ಮುಖಾರ್ ದವರ್ಲಿ.
ಕಾರ್ಯಕ್ರಮಾಚಿ ಅಧ್ಯಕ್ಷ್, ಪೆರ್ಮನ್ನೂರ್‌ಚೊ ವಿಗಾರ್, ಸಿ.ಎಲ್.ಸಿ.ಚೊ ದಿರೆಕ್ತೊರ್, ಮಂಗ್ಳುರ್ ದಕ್ಷಿಣ್ ವಾರಾಡ್ಯಾಚೊ ವಿಗಾರ್‌ವಾರ್, ಭೊ| ಮಾ| ಸಿಪ್ರಿಯನ್ ಪಿಂಟೊ ಬಾಪಾಂನಿ ಬಾಂಗ್ರಾಳೋತ್ಸವಾಚೆ ಲಾಂಛನ್ ಉದ್ಘಾಟನ್ ಕರ್ನ್ 49 ವರ್ಸಾ ಆದಿ 11 ಜಣ್ ಸಾಂದ್ಯಾ ಥಾವ್ನ್ ಆರಂಭ್ ಜಾಲ್ಲೊ ಹೊ ಸಮುದಾಯ್ ಆತಾಂ 49 ವರ್ಸಾಂ ಸಂಪೊವ್ನ್ 50ವ್ಯಾ ವರ್ಸಾಕ್ ಪಾಂಯ್ ತೆಂಕ್ತಾನಾ ಫಿರ್ಗಜೆಚ್ಯಾ ಸರ್ವತೋಮುಖ್ ಅಭಿವೃದ್ಧೆಕ್ ಆಪ್ಲ್ಯಾ ತಾಂಕಿ ವರ್ತೊ ವಾವ್ರ್ ದೀವ್ನ್ ಆಸಾತ್. ಸರ್ವ್ ಫಿರ್ಗಜ್‌ಗಾರಾಂನಿ ತಾಂಚ್ಯಾ ಹ್ಯಾ ಬಾಂಗ್ರಾಳ್ಯಾ ವರ್ಸಾಕ್ ಮಾಂಡುನ್ ಹಾಡ್ಚಾ ಯೋಜನಾಕ್ ಸಹಕಾರ್ ದೀಂವ್ಕ್ ಸರ್ವಾಂಲಾಗಿ ವಿನಂತಿ ಕರ್ನ್ ಆಪ್ಲೊ ಸಂದೇಶ್ ಪಾಠಯ್ಲೊ. ಸಮುದಾಯೆಚೊ ಸಾಂದೊ ಶ್ರೀ ಪ್ರವೀಣ್ ಡಿಸೋಜಾನ್ ಭಾಂಗ್ರಾಳ್ಯಾ ಉತ್ಸವಾಚಾ ಲಾಂಛನಾಚೊ ವಿವರ್ ದಿಲೊ.
ಮುಖೆಲ್ ಸಯ್ರೊ ಜಾವ್ನ್ ವೆದಿ ಸೊಭಯ್‌ಲ್ಲೆ ಸಿ.ಎಲ್.ಸಿ.ಚಾ ಕೇಂದ್ರಿಯ್ ಸಮಿತಿಚೊ ಆತ್ಮೀಕ್ ನಿರ್ದೇಶಕ್, ಮಾ| ಬಾ| ಅನಿಲ್ ಡಿಮೆಲ್ಲೊ ಜೆ. ಸ., ಹಾಣಿಂ ಭಾಂಗ್ರಾಳೋತ್ಸವಾಚೊ ‘ಪ್ರೊಮೊ’ ಉದ್ಘಾಟನ್ ಕರ್ನ್ ತುಮಿ 49 ವರ್ಸಾಂಚೆ ಲೇಖ್ ಕರಿನಾಕಾತ್, ತುಮಿ ಆರ‍್ಸಿಯಾ ತುಮ್ಚೊ ಭಾರ್ವಾರ್ಥ್, ಫಿರ್ಗಜೆಂತ್ ಕೆಲ್ಲಿ ಸೆವಾ, ತುಮ್ಚೊ ವಾವ್ರ್, ತುಮ್ಚೊ ಎಕ್ವಟ್ ಆರ‍್ಸಿಯಾ, ಜೆಜು ಖಾತಿರ್ ತುಮಿ ಕಿತೆಂ ಕೆಲಾಂ, ಕಿತೆ ಕರ್ನ್ ಆಸಾತ್, ಕಿತೆಂ ಕರುಂಕ್ ಜಾಯ್ ಮ್ಹಳ್ಳಾ ವಿಷಯಾಂತ್ ಚಿಂತಾಪ್ ಆಟೊಂವ್ಕ್ ಉಲೊ ದಿಲೊ.
ಕೊಂಕಣಿ ಸಾಹಿತಿ, ಪತ್ರ್ ಕರ್ತ್ ಆನಿ ನಾಟಕಿಸ್ತ್, ಕಾರ್ಯಚೊ ಮಾನಾಚೊ ಸಯ್ರೊ ಶ್ರೀ ಡೊಲ್ಫಿ ಲೋಬೊ ಕಾಸ್ಸಿಯಾ, ಸಮುದಾಯೆಚಾ ಸಾಂದ್ಯಾಚೆ ಜೆರ್ಸಿ ಉದ್ಘಾಟನ್ ಕರ್ನ್ 49 ವರ್ಸಾಂ ಸಂಪವ್ನ್ 50ವ್ಯಾ ಉಂಬ್ರಾರ್ ಆಸ್ಚೊ ಹೊ ಸಮುದಾಯ್ ಲ್ಹಾನಾಂ ವ್ಹಡಾ ಸಾಂಗಾತಾ ಘೆವ್ನ್ ಫಿರ್ಗಜೆಂತ್ ಸೆವಾ ದಿಂವ್ಚಿ ಕಷ್ಟಾಂಚಿ ತರ್‌ಯಿ, ಹೆ ಕಾಮ್ ಸಲೀಸ್ ಕರುಂಕ್ ಕೊಸೆಸಾಂವ್ ಸಾಯ್ಬಿಣ್ ತುಮ್ಕಾ ಆಧಾರ್ ದಿತೆಲಿ ತಶೆಂಚ್ ತುಮ್ಚೊ ದಿರೆಕ್ತೊರ್ ತುಮ್ಚೊ ಸಾಂಗಾತಾ ರಾವೊನ್ ತುಮ್ಕಾ ಪಾಟಿಂಬೊ ದಿತಲೊ ಮ್ಹಳ್ಳೊ ಭರ್ವಸೊ ಮ್ಹಾಕಾ ಆಸಾ ಮ್ಹಣೊನ್ ತಾಂಚ್ಯಾ ಉತ್ರಾಂನಿ ಸಂದೇಶ್ ದಿಲೊ.
ಮಾನಾಚೊ ಸಯ್ರೊ ಸಿ.ಎಲ್.ಸಿಚೊ ಕೇಂದ್ರಿಯ್ ಅಧ್ಯಕ್ಷ್ ಶ್ರೀ ಲಿಸ್ಟನ್ ಡಿಸೋಜ, ಬಜಾಲ್ ಹಾಣಿಂ ಸಮುದಾಯೆಚ್ಯಾ ಸಾಂದ್ಯಾಚಿ ವಳ್ಕೆ ಕಾರ್ಡ್ (ID) ಉದ್ಘಾಟನ್ ಕರ್ನ್, ಪೆರ್ಮನ್ನೂರ್‌ಚೆ ಸಿ.ಎಲ್.ಸಿ. ಆಮ್ಚಾ ದಿಯೆಸೆಜಿಕ್ ಏಕ್ ಥಿಕ್ ಜಾವ್ನಾಸಾ ಮ್ಹಣೊನ್ ಹೊಗ್ಳಿಕ್ ಉಚಾರುನ್ ಸಮುದಾಯೆಕ್ ಬರೆಂ ಮಾಗ್ಲೆಂ, ಉಪ್ರಾಂತ್ ಭಾಂಗ್ರಾಳ್ಯಾ ವರ್ಸಾಚ್ಯಾ ಉಗ್ಡಾಸಾಕ್ ಆಸಾ ಕರ್ಚ್ಯಾ ಸ್ಮಾರಕ್ ಪುಸ್ತಕಾಚೆ ಮಾನವಿ ಪತ್ರ್ ಫಿರ್ಗಚ್ ಉಪಾಧ್ಯಕ್ಷ್ ಶ್ರೀ ಅರುಣ್ ಡಿಸೋಜ, ಕಾರ್ಯದರ್ಶಿ ಶ್ರೀಮತಿ ಜ್ಯೋತಿ ಡಿಸೋಜಾ, ಆಯೋಗಾಚೊ ಸಂಯೋಜಕ್ ಶ್ರೀ ಡೊಲ್ಫಿ ಡಿಸೋಜ, ಹಾಣಿಂ ಸಾಂಗತಾ ಮೆಳೊನ್ ಮೊಕ್ಳಿಕ್ ಕೆಲೆಂ.
ಭಾಂಗ್ರಾಳ್ಯಾ ಉತ್ಸವಾಚಾ ಉಗ್ಡಾಸಾಕ್ ಮಾನಾಂಚಾ ಸರ‍್ಯಾಂಕ್ ಆನಿ ವಾಡ್ಯಾಗಾರಾಂಕ್ ಸಮುದಾಯೆಚೊ ಸ್ಥಾಪಕ್ ಅಧ್ಯಕ್ಷ್ ಶ್ರೀ ಮೌರಿಸ್ ಮೊಂತೇರೊ ಆನಿ ಸ್ಥಾಪಕ್ ಸಾಂದೊ ಶ್ರೀ ರಿಚ್ಚಾರ್ಡ್ ಡಿಸೋಜಾ ಹಾಣಿಂ ಉಗ್ಡಾಸಾಚಿ ಕಾಣಿಕ್ ವಿತರಣ್ ಕೆಲಿ.
ವೆದಿಚೆರ್ ಮಾನಾಚೆ ಸಯ್ರೆ ಜಾವ್ನ್ ಪೆರ್ಮನ್ನೂರ್ ಫಿರ್ಗಜೆಚೆ ಸಹಾಯಕ್ ವಿಗಾರ್ ಮಾ| ಬಾ| ಜೊನ್ಸನ್ ಪಿರೇರಾ, ಬೆಥೆಲ್ ಕೊವೆಂತಾಚಿ ವ್ಹಡಿಲ್ನ್, ಸಿಸ್ಟರ್ ಜೋಸೆಫ್ ಮೇರಿ, ನಿರ್ಮಲಾ ಕೊವೆಂತಾಚಿ ಸುಪೀರಿಯರ್ ಸಿಸ್ಟರ್ ಆಲ್ಫೊನ್ಸಾ, ನೆಹರುನಗರ್ ಕೊವೆಂತಾಚಿ ವ್ಹಡಿಲ್ನ್, ಸಿಸ್ಟರ್ ಎಜಿಲ್ಡಾ ವೇದಿಚೆರ್ ಹಾಜರ್ ಆಸ್‌ಲ್ಲೆಂ.
ಸಮುದಾಯೆಚೊ ಕಾರ್ಯದರ್ಶಿ ಶ್ರೀ ಚಾರ್ಲ್ಸ್ ಡಿಲೀಮಾನ್ ಧನ್ಯವಾದ್ ಪಾಟಯ್ಲೆ. ಸಗ್ಳೆ ಕಾರ್ಯಕ್ರಮ್, ಸಾಂದೊ ಶ್ರೀ ರಾಯಾನ್ ಡಿಸೋಜ ಆನಿ ಶ್ರೀ ಹೆರಾಲ್ಡ್ ಸೆರಾ ಹಾಣಿಂ ಚಲೊನ್ ವೆಲೆಂ. ಹಾಜರ್ ಆಸ್‌ಲ್ಲಾ ಸರ್ವಾಂಕ್ ಕಾಫಿ ಫಳ್ಹಾರಾಚಿ ವ್ಯವಸ್ಥಾ ಕೆಲ್ಲಿ.
ನಿಮಾಣೆ ಮರಿಯೆಚ್ಯಾ ಗೀತಾ ಸಂಗಿ ಕಾರ್ಯಕ್ರಮ್ ಸಂಪಯ್ಲೆ.
